នៅ ថ្ងៃចន្ទនេះធនាគារកណ្ដាលរបស់ប្រទេស G7 បានជួបប្រជុំគ្នាហើយប្តេជ្ញា ថានឹងចាត់វិធានការណ៍ដើម្បីធ្វើឲ្យវិស័យហិរញ្ញវត្ថុមានលំនឹងឡើង វិញ។“យើងប្ដេជ្ញាថា នឹងចាត់វិធានការណ៍ដើម្បីធានានូវទុនបង្វិលដើម្បីជួយគាំទ្រឲ្យ មានស្ថិរភាពហិរញ្ញវត្ថុ និងការរីកចម្រើន សេដ្ឋកិច្ចនៅខណៈដែលអាមេរិក និងអឺរ៉ុបកំពុងតែប្រឈមវិបត្តិបំណុលនិងឱនភាពហិរញ្ញវត្ថុ” ។ នេះបើយោងតាមរបាយការណ៍រួមរបស់ប្រទេសមហាអំណាចឧស្សាហកម្ម G7 រួមមានប្រទេស អង់គ្លេស កាណាដា បារាំង អាល្លឺម៉ង់ ជប៉ុន អ៊ីតាលី និងអាមេរិក។
ថ្មីៗនេះ ក្រុមហ៊ុន Standard & Poor’s ដែលមានទីស្នាក់ការធំនៅអាមេរិក បានកាត់សក្ដានុពលអាមេរិកផ្នែកសេដ្ឋកិច្ចពីចំណាត់ថ្នាក់AAA មកAA+ ដោយសារតែប្រទេសនេះកំពុងតែជួបវិបត្តិបំណុល និងឱនភាពថវិកាធ្ងន់ធ្ងរ។ ចំពោះការធ្លាក់ចំណាត់ថ្នាក់នេះ ជប៉ុនដែលជាប្រទេសម្ចាស់បំណុលធំទី២បន្ទាប់ពីចិន បានអះអាងថា ជប៉ុននៅតែមានទំនុកចិត្តចំពោះសញ្ញាប័ណ្ណរបស់រដ្ឋាភិបាលអាមេរិក ហើយអូស្ត្រាលី បារាំងនិងកូរ៉េខាងត្បូងក៏យល់ស្របជាមួយជប៉ុន។
ដោយឡែក ភ្នាក់ងារឥណទានចិនយល់ថា ការធ្លាក់ចុះចំណាត់ថ្នាក់នេះ នឹងនាំឲ្យមានចលាចលរយៈពេលវែង ហើយចិននឹងជួបហានិភ័យដែលខ្លួនកំពុងតែ កាន់ប័ណ្ណរតនាគាររបស់អាមេរិកដែលមានតម្លៃសរុប១.១៦ពាន់ពាន់ លានដុល្លារ គិតត្រឹមខែឧសភា ឆ្នាំ២០១១នេះ។ លើសពីនេះ ចិនក៏ធ្លាប់រិះគន់អាមេរិកដែលបានបង្កើតច្បាប់ដំឡើងប្រាក់បំណុលផង ដែរ៕
បកប្រែ៖ ផេង ស៊ីថាន
No comments:
Post a Comment