ពាក្យថា Stock អាចហៅបានពីរបែបថា ប័ណ្ណភាគហ៊ុនឬមូលបត្រកម្មសិទ្ធិ ហើយប័ណ្ណភាគហ៊ុនត្រូវបានចែកជា២ប្រភេទគឺភាគហ៊ុនមានសិទ្ធិបោះឆ្នោតឬភាគហ៊ុនធម្មតា (Common Stock) និងភាគហ៊ុនបុរិមាឬភាគហ៊ុនអាទិភាព(Preferred Stock)។
ភាគហ៊ុនធម្មតាគឺជាប្រភេទភាគហ៊ុនម្យ៉ាង ដែលម្ចាស់ភាគហ៊ុនអាចទទួលបានភាគលាភ (Dividend) ឬកម្រៃផ្សេងៗចុងក្រោយគេបង្អស់នៅលើ ទ្រព្យសកម្មរបស់ក្រុមហ៊ុនសាជីវកម្មដែលបានបោះផ្សាយក្នុងករណី ក្រុមហ៊ុននោះក្ស័យធន (Bankrupt)។ ត្រង់ចំណុចនេះមានន័យថា បើក្រុមហ៊ុនក្ស័យធន អ្នកកាន់កាប់មូលបត្រផ្សេងៗទៀតដូចជា សញ្ញាប័ណ្ណនិងភាគហ៊ុនអាទិភាពនឹងទទួលបានការទូទាត់មុនភាគហ៊ុន ធម្មតានេះ។ តែដោយឡែកម្ចាស់ភាគហ៊ុនធម្មតា អាចមានសិទ្ធិបោះឆ្នោតទាក់ទងនឹងការគ្រប់គ្រងផ្សេងៗ (សិទ្ធិសម្រេចចិត្តផ្សេងៗ) នៅក្នុងក្រុមហ៊ុន។ ជាទូទៅម្ចាស់ភាគហ៊ុនធម្មតា អាចទទួលបានប្រយោជន៍តាមរយៈការឡើងថ្លៃនៃតម្លៃភាគហ៊ុន និងទទួលបានភាគលាភសមមូលទៅនឹងប្រាក់ចំណេញរបស់ក្រុមហ៊ុន។
ភាគហ៊ុនអាទិភាព(Preferred Stock)
ម្ចាស់ភាគហ៊ុនអាទិភាព គ្មានសិទ្ធិបោះឆ្នោតនៅក្នុងក្រុមហ៊ុនទេ តែក្នុងករណីដែលក្រុមហ៊ុនជួបបញ្ហាក្ស័យធនម្ចាស់ភាគហ៊ុនអាទិភាព មានសិទ្ធិទទួលភាគលាភឬក៏ទាមទារសិទ្ធិទទួលផលលើទ្រព្យសកម្ម ទាំងឡាយរបស់ក្រុមហ៊ុន មុនម្ចាស់ភាគហ៊ុនធម្មតា (Common Stock) តែក្រោយម្ចាស់បំណុលដែលកាន់កាប់សញ្ញាប័ណ្ណ (Bond) ដែលបានបោះផ្សាយដោយក្រុមហ៊ុន។ ភាគលាភនឹងត្រូវបានបែងចែកទៅឲ្យម្ចាស់ហ៊ុនទាំងអស់ដោយ ក្រុមប្រឹក្សាភិបាលនៃក្រុមហ៊ុនបោះផ្សាយ។ ជាទូទៅ ភាគលាភ ត្រូវបានប្រកាសឲ្យក្នុង ទម្រង់ជាប្រាក់ឬតម្លៃភាគហ៊ុនបន្ថែម។
No comments:
Post a Comment