Rungrado May Day គឺជាពហុកីឡដ្ឋានដែលធំជាងគេបំផុតនៅលើពិភពលោក ។ ពហុកីឡដ្ឋាននេះមានទីតាំងស្ថិតនៅតាមដងទន្លេ Taedong ក្នុងទីក្រុងព្យុងយ៉ាង ប្រទេសកូរ៉េខាងជើង ។ វាត្រូវបានកសាងឡើងនៅក្នុងឆ្នាំ១៩៨៦ ដោយចំណាយរយៈពេល២ឆ្នាំកន្លះ ហើយបានសម្ពោធដាក់ឱ្យប្រើប្រាស់នៅថ្ងៃទី១ ខែឧសភា ឆ្នាំ១៩៨៨ ។
ពហុកីឡដ្ឋាន Rungrado May Day ត្រូវបានសាងសង់ឡើងលើផ្ទៃដីសរុប២២.៥០០ម៉ែត្រការ៉េ មានកម្ពស់៦ជាន់ដែលស្មើនឹង៦០ម៉ែត្រគិតពីដីទៅដល់ដំបូល ដែលមានរាងប៉ោងដូចធ្នូចំនួន១៦ ហើយវាអាចផ្ទុកទស្សនិកជនបានចំនួន១៥ម៉ឺននាក់ដែលចំនួននេះ បានកើនឡើងទៅដល់១៩ម៉ឺននាក់ កាលពីអំឡុងពេលបើកសម្ពោធដោយការអង្គុយប្រជ្រៀតគ្នា ។ ដោយស្ថិតនៅក្នុងភូមិសាស្ត្រតាមដងទន្លេដំបូលរបស់វាមើលទៅ ហាក់បីដូចជាផ្កាដ៏ធំមួយដែលកំពុងអណ្តែតលើផ្ទៃទឹកដ៏ថ្លាក្នុង ទន្លេ Taedong ឬមើលទៅហាក់បីដូចជាមានឆត្រយោងដែលកំពុងចុះចត ។ ការចំណាយទៅលើការសាងសង់នេះមិនត្រូវបានបង្ហើបឱ្យដឹងនោះទេ ក៏ប៉ុន្តែវាស្ថិតនៅក្នុងគម្រោងសាងសង់ដែលមានទឹកប្រាក់១៤ ពាន់លានដុល្លារ ។ដោយមានការគិតគូរខ្ពស់ពីសុវត្ថិភាពស្ថាបត្យករ បានធ្វើទ្វារចេញចំនួន៨០ជាមួយនឹងជណ្តើរយន្តចំនួន១០ ។ ពហុកីឡដ្ឋាននេះត្រូវបានប្រើប្រាស់ជាចំបងសម្រាប់ការប្រកួត បាល់ទាត់ហើយមុខងារបន្ទាប់បន្សំគឺប្រើសម្រាប់អត្តពលកម្ម និងកីឡាកាយសម្ព័ន្ធផងដែរ ។ ចំណែកឯពហុកីឡដ្ឋានធំបន្ទាប់ទី២ គឺពហុកីឡដ្ឋាន Salt Lake (ឥណ្ឌា) ផ្ទុកទស្សនិកជនបាន១២ម៉ឺននាក់ និងពហុកីឡដ្ឋាន Michigan (អាមេរិក) លំដាប់លេខ៣ អាចផ្ទុកមនុស្សបាន១០៩.៩០១នាក់ ៕
No comments:
Post a Comment