ទាំងមន្ត្រីរាជរដ្ឋាភិបាល ក្រុមអ្នកសេដ្ឋកិច្ច និងវិនិយោគិនជាច្រើនបានសាទរ ការបើកសម្ពោធផ្សារមូលបត្រកម្ពុជា ដោយរំពឹងថា ទីផ្សារនេះនឹងជម្រុញឲ្យសេដ្ឋកិច្ចកម្ពុជាបោះជំហានទៅមុខ មួយកម្រិតទៀត ជាពិសេស ជួយគៀងគរប្រមូលធនហិរញ្ញវត្ថុសម្រាប់ជួយគាំទ្រដល់ដំណើរការ អាជីវកម្ម។
ឯក ឧត្តម គាត ឈន់បានសង្កត់ធ្ងន់ថា ទីផ្សារមូលបត្រមានសារៈសំខាន់បំផុតសម្រាប់សេដ្ឋកិច្ចកម្ពុជា។ ទីផ្សារមូលបត្រកម្ពុជាបំពេញកិច្ចការនេះ ដោយផ្ដល់លក្ខខណ្ឌបួនសំខាន់ៗ គឺលើកកម្ពស់អភិបាលកិច្ចសាជីវកម្ម បង្កើនប្រសិទ្ធភាពសម្រាប់ក្រុមហ៊ុនក្នុងការគ្រប់គ្រងហានិភ័យ លើកកម្ពស់តម្លាភាពនិងគណនេយ្យភាពក្នុងអាជីវកម្ម និងជំរុញឲ្យមានការប្រកាន់ខ្ជាប់នូវក្រមវិជ្ជាជីវៈច្បាស់ លាស់។
ស្របជាមួយគ្នានេះដែរ លោក គី វ៉ុងស៊ូ អគ្គនាយកក្រុមហ៊ុនផ្សារមូលបត្រកូរ៉េ បញ្ជាក់ថា ទីផ្សារមូលបត្រ មិនថានៅកូរ៉េ ឬនៅកម្ពុជាទេ គឺដើរតួនាទីសំខាន់បំផុតនៅក្នុងការលើកស្ទួយសេដ្ឋកិច្ចជាតិទាំង មូល។ លោកថា ទីផ្សារមូលបត្រកូរ៉េបង្កើតឡើងតាំងពីឆ្នាំ១៩៥៦ ក្នុងពេលដែលប្រទេសនេះ កំពុងស្ថិតក្នុងភាពក្រីក្រ តែបច្ចុប្បន្ន ទីផ្សារមូលបត្រកូរ៉េ ឈរនៅលំដាប់លេខ១២ក្នុងពិភពលោក។ លោកប្រៀបប្រដូចស្ថានភាពនេះថា មិនខុសពីកម្ពុជាទេ…ទីផ្សារមូលបត្រនឹងជួយជំរុញសេដ្ឋកិច្ច កម្ពុជាឲ្យរីកចម្រើនបាន ហើយអាចឈរជើងរឹងមាំក្នុងពេលខាងមុខ។ លោកបន្ថែមថា “ទីផ្សារមូលបត្រប្រៀបដូចសរសៃឈាម… ទីផ្សារមូលបត្រមាននាទីគៀងគរមូលធនហិរញ្ញវត្ថុ សម្រាប់ផ្គត់ផ្គង់ដល់សហគ្រាស ហើយកម្ពុជាមានលទ្ធភាពច្រើនអាចទាញយកសក្ដានុពលពីទីផ្សារនេះ បាន”។
ដោយឡែក លោកបណ្ឌិត កង ចាន់ដារារ័ត្ន អ្នកវិភាគសេដ្ឋកិច្ចឯករាជ្យ មានសុទិដ្ឋិនិយមថា នេះជាសញ្ញាណល្អមួយ ហើយនេះបញ្ជាក់ពីជម្រើសថ្មីថែមទៀតក្នុងការប្រមូលធនធានសម្រាប់ វិនិយោគ ឬក៏ប្រមូលធនធានសម្រាប់ប្រើប្រាស់ក្នុងសេដ្ឋកិច្ច។ ក៏ប៉ុន្តែ យើងរង់ចាំមើលសភាពការណ៍តទៅទៀតថា តើនឹងមានក្រុមហ៊ុនវិនិយោគ និងមហាជនប៉ុន្មានចូលរួម។ លោកបន្ថែមថា ទំនុកចិត្តរបស់មហាជនលើទីផ្សារមូលបត្រកើតមាន នៅពេលដែលទីផ្សារនេះដំណើរការបានល្អ…ការទើបចាប់ផ្ដើម មិនទាន់អាចបញ្ជាក់បានថា មហាជនមានទំនុកចិត្តប៉ុណ្ណានោះទេ គឺត្រូវចាំមើលដំណើរការណ៍តទៅទៀត។
ក្រុមហ៊ុនទីផ្សារមូលបត្រត្រូវបានផ្ដួចផ្ដើមបង្កើតកាលពី ឆ្នាំ២០០៨ ក្រោមអនុសារណៈយោគយល់គ្នារវាងរដ្ឋាភិបាលកម្ពុជា និងក្រុមហ៊ុនមូលបត្រកូរ៉េក្នុងសមាមាត្រវិនិយោគ កម្ពុជា៥៥% ក្រុមហ៊ុនមូលបត្រកូរ៉េ៤៥%។ ទីផ្សារនេះដើរតួនាទីជា ប្រតិបត្តិករទីផ្សារមូលបត្រ ប្រតិបត្តិករប្រព័ន្ធផាត់ទាត់និងទូទាត់មូលបត្រ និងប្រតិបត្តិកររក្សាទុកមូលបត្រ ហើយចំពោះការជួយដូរមូលបត្រដំបូងក្នុងក្រុមហ៊ុននេះនឹងត្រូវ ចាប់ផ្ដើមធ្វើនៅបំណាច់ឆ្នាំ២០១១នេះ៕
ដោយ៖ យ៉ន សុភារិទ្ធ
រូបថត៖ ប៉ែន ប៊ុនថាល់http://news.sabay.com.kh/articles/118165
No comments:
Post a Comment