លោក កែវ រ៉េមី អ្នកនាំពាក្យរបស់អង្គភាពប្រឆាំងអំពើពុករលួយបានឲ្យដឹងកាលពី ម្សិលមិញអំពីការបែកធ្លាយជាសាធារណៈពីសំណូករបស់ក្រុមហ៊ុនរ៉ែរបស់ ប្រទេសអូស្ត្រាលី និងក្រុមហ៊ុនបរទេសមួយចំនួនទៀតទៅឲ្យក្រុមគ្រួសារអ្នកមានអំណាច ជាថ្នូរចំពោះការសម្របសម្រួលដល់សកម្មភាពរកស៊ីរបស់ពួកគេលើវិស័យ នេះដោយសំអាងថា «វាជាការសម្ងាត់»។
លោក កែវ រ៉េមី បានឆ្លើយថា ប្រសិនបើអង្គភាពប្រឆាំងអំពើពុករលួយបង្ហាញព័ត៌មានច្រើនពេកអំពី ការស៊ើបអង្កេតនោះជនដែលជាគោលដៅនឹងដឹងថា រដ្ឋាភិបាលចាប់ផ្ដើមស៊ើបអង្កេត ហើយជនសង្ស័យនឹងចាប់ផ្ដើមលុបបំបាត់ភស្ដុតាងចោល។ ដែលវាត្រូវបានគេនិយាយថា ជាភាសាដោះសាមួយដើម្បីបិទបាំងភាពច្របូកច្របល់ចំពោះការតាំងជំហរ របស់អង្គភាពនេះថា នឹងត្រូវចាត់វិធានការលើជនពុករលួយទាំងនោះ ឬយ៉ាងណា?
បញ្ហានេះបានកើតមានបន្ទាប់ពីមានការលេចធ្លាយថា ក្រុមហ៊ុនមួយឈ្មោះ Shin Ha Miningដែលគ្រប់គ្រងដោយពួកមន្រ្ដីក្នុងក្រសួងឧស្សាហកម្មរ៉ែ និងថាមពលបានទទួលលុយចំនួន៤,៦លានដុល្លារកាលពីឆ្នាំ២០០៩ជាថ្នូរ ចំពោះភាគហ៊ុន២០ភាគរយរបស់ខ្លួននៅក្នុងគម្រោងរ៉ែមាសមួយក្នុង ខេត្ដមណ្ឌលគិរីដែលប្រតិបត្តិការដោយក្រុមហ៊ុន OZ Mineralsពីប្រទេសអូស្ត្រាលី។
នៅក្នុងអ៊ីម៉ែលមួយរបស់ក្រុមមន្រ្ដីរដ្ឋាភិបាលនិងក្រុមហ៊ុនShin Ha Mining ដែលត្រូវបានលើកយកមកបង្ហាញដោយព្រឹត្តិបត្រ ឌឹ ឃេមបូឌា ដេលី ចេញផ្សាយនៅថ្ងៃសុក្រនេះថា សមាជិកក្រុមប្រឹក្សានាយករបស់របស់ក្រុមហ៊ុនShin Ha ៣រូបដែលបានទទួលលុយជាង៩០ម៉ឺនដុល្លារនោះ គឺជាម្ដាយក្មេក និងកូនស្រីរបស់មន្រី្ដសំខាន់ៗមកពីក្រសួងឧស្សាហកម្មរ៉ែ និងថាមពល។
មន្រ្ដីទាំងនេះរួមមានលោក កែវ រតនៈ ដែលជានាយកគ្រប់គ្រងបច្ចុប្បន្ននៃក្រុមហ៊ុនអគ្គិសនីកម្ពុជាដែល ធ្លាប់ធ្វើជាប្រធានខុទ្ទកាល័យក្រសួងឧស្សាហកម្ម រ៉ែ និងថាមពលនៅពេលដែលមានការវិនិយោគរួមគ្នារវាងក្រុមហ៊ុន OZ Minerals និងក្រុមហ៊ុន Shin Ha កាលពីឆ្នាំ២០០៦, លោក សុខ ឡេងជាអគ្គនាយកនៃអគ្គនាយកដ្ឋានធនធានរ៉ែ នៃក្រសួងឧស្សាហកម្ម រ៉ែ និងថាមពល និងលោក យស មុនីរ័ត្ន ជាប្រធាននាយកដ្ឋានមួយនៅក្នុងក្រសួងនេះដែរ។
នេះជាការផ្ទុះឡើងជាថ្មីទៀត ខណៈកាលពីឆ្នាំទៅអំពើពុករលួយក្នុងវិស័យនេះបានធ្វើឲ្យមានរឿង ចម្រូងចម្រាសខ្លាំងក្លារវាងក្រុមមន្រ្ដីមានអំណាចក្នុងរដ្ឋាភិបាល ជាមួយក្រុមហ៊ុនTOTALរបស់ប្រទេសបារាំងដែលទទួលបានសិទ្ធិលើការរុករក ប្រេងនៅតំបន់មួយនាឈូងសមុទ្រកម្ពុជា និងក្រុមហ៊ុនរុករករ៉ែដ៏ធំមួយពីប្រទេសអូស្ត្រាលីឈ្មោះ BHP Billiton ដែលបានចំណាយលុយអស់រាប់លានដុល្លារទៅឲ្យក្រុមមន្រ្ដីរដ្ឋាភិបាល ជាថ្នូរនឹងការបានសិទ្ធិធ្វើអាជីវកម្មនៅកម្ពុជា។
សេចក្ដីរាយការថា មានក្រុមហ៊ុនធំៗដែលបានចូលមករកស៊ីនៅក្នុងប្រទេសកម្ពុជាសុទ្ធសឹង តែមានភាគហ៊ុនរបស់អ្នកមានអំណាច។ ពួកគេពុំមានលុយសម្រាប់ដាក់ហ៊ុនទេ ប៉ុន្ដែពួកគេមានអំណាចក្នុងការសម្រួលឲ្យក្រុមហ៊ុនទាំងនោះធ្វើ សកម្មភាពដោយសេរី។ ដែលជាការបញ្ជាក់បានថា ផលប្រយោជន៍របស់ជាតិកំពុងតែត្រូវបានហែកចែកគ្នាស៊ីដោយពួកអ្នក មានអំណាចក្នុងរដ្ឋាភិបាលនេះ។
លោក យឹម សុវណ្ណ អ្នកនាំពាក្យគណបក្សសមរង្ស៊ីដែលជាគណបក្សប្រឆាំងធំរបស់កម្ពុជា បានថ្លែងកាលពីម្សិលមិញថា «ចំពោះបញ្ហានេះ ខ្ញុំគិតថា អង្គភាពប្រឆាំងអំពើពុករលួយត្រូវតែធ្វើការស៊ើបអង្កេតដោយឯករាជ្យ ឲ្យបានឆាប់តាមដែលអាចធ្វើបាន»។ ដោយបានលើកឡើងថា ការចេញអាជ្ញាប័ណ្ណរ៉ែនៅកម្ពុជាពុំមានតម្លាភាពទេ៕
No comments:
Post a Comment