ដោយ ៖ ម៉ែវ សាធី
ថ្ងៃទី 05-05-2011 ម៉ោង 09:47:40
តាម របាយការណ៍ដែលបានប្រកាសកាលពីថ្ងៃទី៤ ឧសភា របស់អង្គការសហប្រជាជាតិបានបង្ហាញថា ពលរដ្ឋនៅលើពិភពលោកនាពេលបច្ចុប្បន្នជិត៧ពាន់លាននាក់។ តាមគម្រោងនៅឆ្នាំ២០៥០ នឹងឈានដល់៩.៣ពាន់លាននាក់ ហើយតួលេខនោះនឹងកើនដល់១០.១ពាន់លាននាក់នៅឆ្នាំ២១០០។
របាយការណ៍នេះធ្វើឡើងដោយគណៈកម្មាធិការសេដ្ឋកិច្ច និងសង្គម (DESA) ក្នុង នោះបានបញ្ជាក់យ៉ាងច្បាស់នូវកំណើនប្រជាជនកាន់តែកើនខ្ពស់គិត ចាប់តាំងពីឆ្នាំ២០១០មក។ តាមរបាយការណ៍នោះ បណ្ដាប្រទេសដែលមានចំនួនអ្នកសម្រាលកូនខ្ពស់ភាគច្រើន នៅតំបន់សាហារ៉ា ទ្វីបអាហ្វ្រិក រួមមាន៣៩ប្រទេសក្នុងចំណោម៥៥ប្រទេស ដែលមានអ្នកសម្រាលកូនច្រើនជាងគេបំផុត។ ក្រៅពីនេះនៅមាន៩ប្រទេសផ្សេងទៀតនៅតំបន់អាស៊ី និង៤ប្រទេសនៅអាមេរិកឡាទីន។
ក្នុង ពេលនោះ ប្រទេសដែលមានចំនួនទារកតិចបំផុត គឺនៅតំបន់អឺរ៉ុបលើកលែងតែប្រទេសអាយឡេន។ ១៩ក្នុងចំណោម៥១ប្រទេសនៅអាស៊ីដែលមានអ្នកឆ្លងទន្លេតិច ក្នុងនោះរួមមានចិនជាដើម។ ប្រទេស១៤ក្នុងចំណោម៣៩ប្រទេសនៅអាមេរិកឡាទីន មានចំនួនទារកតិច។
លោកស្រី ហានៀ ស្លូនីក អ្នកទទួលបន្ទុកបញ្ហាកំណើនប្រជាជនរបស់ DESA ចាត់ ទុកថា ចំនួនទារកកើតមកជាមូលហេតុសំខាន់នៅក្នុងកំណើនប្រជាជននាពេលប ច្ចុប្បន្ន។ លោកស្រីបន្ដថា “ភពផែនដីនឹងមិនដួលរលំឡើយពេលដែលមានមនុស្សកាន់តែច្រើននោះ។ បញ្ហានៅត្រង់ចំណុចទារកដែលកើតមកនោះ ភាគច្រើននៅក្នុងប្រទេសក្រីក្របំផុតលើពិភពលោក ដែលអាចឱ្យពិភពលោកដួលរលំបាន”។
សេចក្ដី ប្រកាសនោះបានបញ្ជាក់ទៀតថា រហូតដល់ឆ្នាំ២១០០ កំណើនប្រជាជននៅប្រទេសដែលមានចំនួនអ្នកឆ្លងទន្លេច្រើន ក៏នៅតែគ្មានសញ្ញាថយចុះ។ នៅដំណាក់កាលឆ្នាំ២០៩៥ និង២១០០ ប្រជាជននៅបណ្ដាប្រទេសដែលមានចំនួនទារកកើតមកតិច និងមធ្យមអាចថយចុះប្រមាណ០.៣ភាគរយ ក្នុងមួយឆ្នាំ។ ចំណែកប្រទេសដែលមានការសម្រាលកូនច្រើនក៏កើន០.៥ភាគរយក្នុងមួយឆ្នាំផងដែរ។
មាន ៤២ភាគរយ ពលរដ្ឋពិភពលោក កំពុងរស់នៅក្នុងប្រទេសដែលមានកម្រិតជីវភាពទាប ហើយភាគច្រើននៃប្រទេសទាំងនោះស្ថិតនៅទ្វីបអាស៊ី។ ប្រសិនបើគ្មានវិធានការឱ្យបានល្អទេនោះ កំណើនប្រជាជនលើពិភពលោកនឹងកើនទ្វេដងពីគម្រោងដែលបានលើកឡើង៕
No comments:
Post a Comment