ថ្ងៃទី 03-05-2011 ម៉ោង 14:31:03
ការ ស្លាប់របស់មេដឹកនាំភេរវកម្មដ៏មានឥទ្ធិពលបំផុតលើពិភពលោក អូសាម៉ា ប៊ីនឡាដេន ត្រូវសម្លាប់ គឺជាចំណុចមួយដ៏សំខាន់សម្រាប់បណ្ដាញផ្សព្វផ្សាយនានា ក៏ដូចជាពលរដ្ឋនៅលើពិភពលោកទាំងមូល។ ពិភពលោកសប្បាយរីករាយអបអរសាទរពេលទទួលបានព័ត៌មានថាប៊ីនឡាដេន ស្លាប់។ ប៉ុន្ដែមានមនុស្សមិនតិចឡើយដាក់សំណួរថា តើអាមេរិកមានភស្ដុតាងគ្រប់គ្រាន់ ដើម្បីបញ្ជាក់ការពិតថាអ្នកដែលទាហានអាមេរិកសម្លាប់នោះជាអូ សាម៉ា ប៊ីនឡាដេន។
ប្រធានាធិបតី អាមេរិក បារ៉ាក់ អូបាម៉ា កាលពីថ្ងៃទី១ ឧសភា បានប្រកាសតាមកញ្ចក់ទូរទស្សន៍ប្រាប់ពលរដ្ឋអាមេរិក និងពិភពលោកថា អាមេរិកសម្លាប់បានមេដឹកនាំភេរវកម្ម អូសាម៉ា ប៊ីនឡាដេន ហើយក្នុងការវាយប្រហារតាមដែនអាកាសទៅលើទីតាំងរស់នៅរបស់ប៊ីន ឡាដេននៅជាយក្រុងអ៊ិស្លាម៉ាបាត ប្រទេសប៉ាគីស្ថាន។
តើអាមេរិកមានភស្ដុតាងគ្រប់គ្រាន់ដែរឬទេ ?
ពេល ដំបូងគេបានបញ្ជាក់នូវរូបភាពអ្នកដែលត្រូវសម្លាប់នោះ គឺ ប៊ីនឡាដេន តាមរយៈការត្រួតពិនិត្យផ្ទៃមុខជនដែលស្លាប់នោះ។ ក្រោយមក អាមេរិកបានបង្ហាញនូវលទ្ធផលឌីអិនអេដោយបញ្ជាក់ថា អ្នកដែលស្លាប់នោះ គឺប៊ីនឡាដេន៩៩,៩ភាគរយ។
ប៉ុន្ដែ រហូតមកទល់ពេលនេះ មនុស្សជាច្រើននៅជុំវិញពិភពលោកមន្ទិលសង្ស័យនូវរូបភាពដែលបាន ផ្សព្វផ្សាយ ពេលដំបូងថាជាសពប៊ីនឡាដេននោះ អាចជារូបភាពក្លែងក្លាយ កាត់តតាមប្រព័ន្ធបច្ចេកវិទ្យា។ មកទល់ពេលនេះ រូបភាពពិតរបស់ប៊ីនឡាដេនស្លាប់ មិនទាន់មានបណ្ដាញផ្សព្វផ្សាយ ក៏ដូចរដ្ឋាភិបាលអាមេរិកបង្ហាញជាសាធារណៈ ដូចមេដឹកនាំអ៊ីរ៉ាក់ សាដាម ហ៊ូសេននៅឡើយ។
កាល ពីថ្ងៃទី២ ឧសភា រូបភាពសាកសពប៊ីនឡាដេនត្រូវបណ្ដាញទូរទស្សន៍ប៉ាគីស្ថាន ផ្សព្វផ្សាយក្រោយពេលអាមេរិកបាញ់សម្លាប់។ ក្រោយមកប៉ុន្មានម៉ោងរូបភាពទាំងនោះត្រូវគេដឹងថាជា រូបភាពក្លែងក្លាយ , លទ្ធ ផលគឺបណ្ដាញផ្សព្វផ្សាយល្បីៗនៅលើពិភពលោករង ការបោកប្រាស់មួយយ៉ាងអាម៉ាស់ ដោយសារតែនោះជារូបភាពកាត់តតាមបច្ចេកទេសកុំព្យូទ័រតែប៉ុណ្ណោះ ។ រូបភាពបានកាត់តពីសាកសពបុរសពិត ប៉ាគីស្ថានម្នាក់ស្លាប់ និងរូបភាពប៊ីនឡាដេន ដែលថតកាលពីឆ្នាំ១៩៩៨។
ហេតុអ្វីបានជាអាមេរិកត្រូវបញ្ចុះសពក្នុងសមុទ្រ ?
អា មេរិកបានរៀបចំគម្រោងកប់សាកសពរបស់ប៊ីនឡាដេនតាំងពីប៉ុន្មាន ខែមុនការវាយប្រហារកើតឡើងម្ល៉េះ ដោយអាមេរិកធ្វើទៅតាមប្រពៃណីរបស់សាសនាអ៊ិស្លាម។
លោក John Brennan ទី ប្រឹក្សាសេតវិមានបានឱ្យដឹងថា សាកសពរបស់ ប៊ីនឡាដេន បានរៀបចំតាមប្រពៃណីអ៊ិស្លាម កាន់តែឆាប់កាន់តែល្អក្នុងរយៈពេល២៤ម៉ោង។ ប៉ុន្ដែការកប់សាកសពរបស់ប៊ីនឡាដេននាពេលនោះធ្វើឡើងមិនដល់ ១២ម៉ោងផងក្រោយការវាយប្រហារដោយអាមេរិកបានបញ្ជូនទៅដាក់លើ នាវាផ្ទុកយន្ដហោះ USS Carl Vinson នៅ តំបន់សមុទ្រអារ៉ាប់។ លោក ចន ប្រេនណេន បញ្ជាក់ទៀតថា គេបានលាងសាកសព ហើយគ្របកំណាត់សមួយផ្ទាំង មន្ដ្រីទាហានអាមេរិកបន់ស្រន់ ក្រោយមកបកប្រែទៅជាភាសាអារ៉ាប់។ បន្ទាប់មកក៏ដាក់សាកសពនៅក្នុងស្បោងនីឡុងដាក់លើក្ដារមួយផ្ទាំង រួចទម្លាក់ចូលទៅក្នុងសមុទ្រ។
បញ្ចៀសគ្រោះថ្នាក់
អា មេរិកព្រួយបារម្ភខ្លាចពេលកប់ ប៊ីនឡាដេន នៅលើគោក អាចក្លាយជាទីសក្ការបូជារបស់ក្រុមអ៊ិស្លាមជ្រុលនិយម។ ការកប់ប៊ីនឡាដេននៅបាតសមុទ្រ គឺផ្ដល់នូវអារម្មណ៍សុវត្ថិភាពជារៀងរហូត គ្មានអ្វីសេសសល់ឬ ចង់ដឹង ចង់ឃើញទៀតឡើយ ...។
លោក Christopher Meyer អតីត រាជទូតអង់គ្លេសប្រចាំនៅអាមេរិកបានឱ្យដឹងថា “យើងខ្ញុំគិតថា យើងនឹងអាចមើលឃើញរូបភាពពិតរបស់ប៊ីនឡាដេន ឱ្យបានឆាប់ៗពីរដ្ឋាភិបាលអាមេរិក។ ខ្ញុំមិនអាចគិតដល់ថាប្រធានាធិបតីអាមេរិក អាចប្រកាសដល់ពិភពលោកដឹងថា ប៊ីនឡាដេន ត្រូវបាញ់សម្លាប់ ដោយមិនមានភស្ដុតាងណាមួយច្បាស់លាស់សម្រាប់បញ្ជាក់នោះឡើយ”។
តើប៊ីនឡាដេនស្លាប់ពិតប្រាកដឬ ?
នេះ មិនមែនជាលើកទីមួយទេ ដែលប៊ីនឡាដេនបានស្លាប់ ហើយប្រកាសជាសាធារណៈ។ ចាប់តាំងពីពិភពលោក តាមចាប់ខ្លួនបន្ទាប់ពីវាយប្រហារភេរវកម្មទៅលើមជ្ឈមណ្ឌល ពាណិជ្ជកម្មពិភពលោកកាលពីថ្ងៃទី១១ កញ្ញា ២០០១ មានព័ត៌មានថាប៊ីនឡាដេន ស្លាប់ជាច្រើនលើក ប៉ុន្ដែក៏មានព័ត៌មានបញ្ជាក់ដែរថា ប៊ីនឡាដេនពិតជានៅរស់។
តាម តួលេខរបស់សន្ដិសុខអាមេរិក ចាប់តាំងពីអាមេរិកធ្វើសង្គ្រាមនៅអាហ្វហ្គានីស្ថាន ប៊ីនឡាដេន បានចេញសេចក្ដីប្រកាសគំរាមកំហែងអាមេរិក និងពិភពលោកយ៉ាងតិច៤០លើក។
មក ទល់ពេលនេះ ធាតុពិតនៃការស្លាប់ឬនៅរស់របស់ប៊ីនឡាដេននៅតែស្ថិតក្នុង អាថ៌កំបាំងរយៈពេល១ទសវត្សកន្លងមកនៅឡើយ។
ហេតុអ្វីបានជាអាមេរិកមិនចាប់ប៊ីនឡាដេន ទាំងរស់ បែរជាសម្លាប់ ហើយយកទៅបញ្ចុះភ្លាមៗ ?
ម ន្ដ្រីសន្ដិសុខជាតិអាមេរិកមួយរូបបានឱ្យដឹងថា កងកម្លាំងទាហានទទួលភារកិច្ចសម្លាប់ អូសាម៉ា ប៊ីនឡាដេន , ទទួល បញ្ជាឱ្យសម្លាប់មិនមែនចាប់ខ្លួនទាំងរស់មកកាត់ទោសឱ្យពិភពលោក ដឹងឮដូចសាដាមហ៊ូសេនទេ។ មន្ដ្រីជាន់ខ្ពស់អាមេរិកបញ្ជាក់ថា នោះជាយុទ្ធនាការសម្លាប់។ នៅក្នុងយុទ្ធនាការនោះ ប្រទេសប៉ាគីស្ថានមិនបានដឹងជាមុនទេរហូតដល់ទាហានអាមេរិក បាញ់សម្លាប់រួច ទើបផ្ដល់ព័ត៌មានដល់រដ្ឋាភិបាលប៉ាគីស្ថាន , សូម្បីតែសាកសព ក៏មន្ដ្រី និងទាហានប៉ាគីស្ថានមិនបានឃើញដែរ។
នៅ ក្នុងព្រឹត្ដិការណ៍មួយពាក់ព័ន្ធនឹងករណីនេះដែរ ប្រធានគណៈកម្មាធិការសន្ដិសុខផ្ទៃក្នុងរបស់អាមេរិក លោក ចូសេហ្វ លីបឺមេន បានប្រកាសកាលពីថ្ងៃទី២ ឧសភា ថា ប៉ាគីស្ថានត្រូវតែបញ្ជាក់ឱ្យច្បាស់ថា ប្រទេសនេះមិនបានដឹងថា ប៊ីនឡាដេន លាក់ខ្លួននៅក្នុងផ្ទះមួយជិតទីក្រុងអ៊ិស្លាម៉ាបាតនោះ។
ទោះបី មនុស្សជាច្រើនមន្ទិលសង្ស័យទៅលើលទ្ធផលឌីអិនអេ និងរូបភាពក្លែងក្លាយជាមួយនឹងការបញ្ចុះសព “ដូចជាបំបាត់ភស្ដុតាង” ក៏ដោយ ក៏ការស្លាប់របស់ប៊ីនឡាដេននឹងធ្វើឱ្យពិភពលោកគ្មានការសង្ស័យ ដូចមុនឡើយ ព្រោះនេះ ជាសេចក្ដីប្រកាសរបស់ប្រធានាធិបតីអាមេរិកដោយផ្ទាល់លើបណ្ដាញ ផ្សព្វផ្សាយពិភពលោក។
ទោះបី ប៊ីនឡាដេន ស្លាប់ពិតក៏ដោយ អាមេរិកមិនទាន់ប្រាកដថា ទទួលបានសុខសន្ដិភាព មិនរងការគំរាមកំហែងពីបណ្ដាញភេរវកម្មនៅឡើយដែរ។ កន្លងមក មានព័ត៌មានផ្សព្វផ្សាយថា អាល់កៃដា ធ្លាប់គំរាមវាយប្រហារគ្រាប់បែកបរមាណូនៅលើទឹកដីអាមេរិក ប្រសិនបើ ប៊ីនឡាដេន ត្រូវគេសម្លាប់មែននោះ៕
No comments:
Post a Comment