លោក វណ្ណ មួលីវណ្ណ កើតនៅថ្ងៃទី២៣ ខែវិច្ឆិកា ឆ្នាំ១៩២៦ នៅរាម ខេត្តកំពត។ ដើមឡើយ លោកសិក្សាផ្នែកនីតិសាស្ត្រទេ។ លោកបានទទួលសញ្ញាប័ត្រទុតិយភូមិពីវិទ្យាល័យព្រះស៊ីសុវត្ថិ នៅទីក្រុងភ្នំពេញ ក្នុងឆ្នាំ១៩៤៤។ ហើយបានទទួលអាហារូបករណ៍ទៅរៀនផ្នែកច្បាប់នៅទីក្រុងប៉ារីស ប្រទេសបារាំង ក្នុងឆ្នាំ១៩៤៦។ បន្ទាប់ពីសិក្សានៅទីនោះរយៈពេលមួយឆ្នាំ លោកក៏បានប្ដូរទៅរៀនផ្នែកស្ថាបត្យកម្ម នៅសាលាវិចិត្រសិល្បៈមួយនៅប៉ារីស។ លោកបញ្ចប់ការសិក្សាដោយជោគជ័យ ជាមួយនឹងចំណេះដឹងនិងទេពកោសល្យ។ លោកត្រលប់មកប្រទេសកម្ពុជាវិញ នៅឆ្នាំ១៩៥៥ ។ មួយឆ្នាំក្រោយមក ក៏ត្រូវបានគេតែងតាំងជាប្រធានស្ថាបត្យករនៅកម្ពុជា។ លោកជាព្រឹទ្ធបុរសទីមួយនៃ សាកលវិទ្យាល័យភូមិន្ទវិចិត្រសិល្បៈ(ចាប់ពីឆ្នាំ១៩៦៥ ដល់ ឆ្នាំ១៩៦៧)។
នៅទសវត្សរ៍៦០និង៧០ លោក វណ្ណ មូលីវណ្ណ បានគូរប្លង់ស្ថាបនាអាគារល្បីៗជាច្រើននៅកម្ពុជា ជាពិសេសនៅទីក្រុងភ្នំពេញ នៅទីនោះ ស្នាដៃរបស់លោក ឈរយ៉ាងសង្ហាប្រដំប្រសងគ្នាជាមួយនឹងសំណង់អាគារបុរាណៗ វត្តអារាម និងសំណល់ពីសម័យអាណានិគម។ ស្នាដៃសំខាន់ៗរបស់លោកមាន សាលសន្និសីទចតុមុខ អគារគណរដ្ឋមន្ត្រី។ លោកក៏បានគូរប្លង់វត្តអារាមនិងស្ថានទូតខ្មែរនៅបរទេសជាច្រើនផង ដែរ។
នៅឆ្នាំ ១៩៦៣ លោកបានគូរប្លង់ ពហុកីឡាដ្ឋានជាតិអូឡាំពិក ដែលអាចទទួលទស្សនិកជនបានប្រហែល ៤ម៉ឺននាក់។ នៅឆ្នាំដដែល លោកបានស្ថាបនា សាលមហោស្រពជាតិព្រះសុរាម្រិត (មហោស្រពជាតិកម្ពុជា)។ លោកក៏បានគូរប្លង់វិមានឯករាជ្យផងដែរ។
នៅឆ្នាំ ១៩៧២ លោក វណ្ណ មូលីវណ្ណនិងគ្រួសារបានភៀសខ្លួនទៅរស់នៅប្រទេសស្វីស។ លោកធ្វើការអោយ UN Human Settlements Program រយៈពេល១០ឆ្នាំ មុននឹងលោកវិលត្រលប់មកមាតុប្រទេសវិញនៅឆ្នាំ ១៩៩៣។ លោកបានចូលបម្រើការងារជារដ្ឋមន្ត្រីក្រសួងវប្បធម៌ វិចិត្រសិល្បៈ នគរូបនីយកម្ម និង សំណង់។
ស្នាដៃចំបងៗ:សាលសន្និសីទចតុមុខ វិមានឯករាជ្យ (១៩៥៨) ពហុកីឡាដ្ឋានជាតិអូឡាំពិក (១៩៦៤) សំណង់ «ផ្ទះ១០០» ដែលត្រូវបានសាងសង់សម្រាប់បុគ្គលិកធនាគារជាតិកម្ពុជាស្នាក់នៅ (១៩៦៥-១៩៦៧) វិមានរដ្ឋចំការមន សាលមហោស្រពជាតិសុរាម្រឹត (សាលមហោស្រពនេះត្រូវភ្លើងឆេះ កាលពីឆ្នាំ១៩៩៤ ហើយ មហោស្រពនេះមិនដែលត្រូវបានជួសជុលឡើងវិញឡើយ កសាង១៩៦៨) មហាវិទ្យាល័យបណ្ដុះបណ្ដាលគ្រូបង្រៀន នៃវិទ្យាស្ថានភាសាបរទេស (សាកលវិទ្យាល័យភូមិន្ទភ្នំពេញ) ក្រុមហ៊ុនផលិតស្រាបៀរ SKD ខេត្តព្រះសីហនុ។
សាលសន្និសីទចតុមុខ (១៩៥៨)
វិមានឯករាជ្យ (១៩៥៨)
ពហុកីឡាដ្ឋានជាតិអូឡាំពិក (១៩៦៤)
វិមានរដ្ឋចំការមន (១៩៦៦)
អគារគណរដ្ឋមន្ត្រី ចាស់
មហាវិទ្យាល័យ បណ្ដុះបណ្ដាលគ្រូបង្រៀននៃ វិទ្យាស្ថានភាសាបរទេស (១៩៧២)
សាលមហោស្រពសុរាមរិត (១៩៦៨)
ក្រុមហ៊ុនផលិតស្រាបៀរ SKD ខេត្តព្រះសីហនុ (១៩៦៨)
No comments:
Post a Comment